રાજકોટ,

ગરમ પવનો ફૂંકાતાં રાજ્યમાં સૌથી વધુ તાપમાન નોંધાયું

રાજકોટમાં તાપમાનનો પારો બપોરના સમયે ૩૭ ડિગ્રી સેલ્સિયસ સુધી પહોંચી જતા વાતાવરણમાં ભારે ઉકળાટ અને અસહ્ય ગરમી અનુભવાઈ રહી છે. બપોરે ૩ વાગ્યાના અરસામાં કાળઝાળ ગરમી અને શેકાતા ગરમ પવનો ફૂંકાવાને કારણે લોકો ત્રાહિમામ પોકારી ઉઠ્યા છે.

આ ભયંકર ગરમી અને લૂ જેવા માહોલની સીધી અસર શહેરની દિનચર્યા પર જોવા મળી છે. રાજકોટના મુખ્ય રાજમાર્ગો અને ધમધમતી બજારો રવિવારે બપોરના સમયે એકદમ સુમસામ અને વીરાન બની ગયા હતા. રસ્તાઓ પર સામાન્ય દિવસો જેવી ચહલપહલ જોવા મળી નહોતી, કારણ કે લોકો બપોરના સમયે અત્યંત જરૂરી કામ વગર ઘરની બહાર નીકળવાનું ટાળી રહ્યા છે. અસહ્ય ગરમી અને તાપના પ્રકોપથી બચવા માટે નાગરિકો પોતપોતાના ઘરોમાં જ પુરાઈ રહેવા મજબૂર બન્યા છે, જેના કારણે બજારોમાં પણ સન્નાટો છવાયો છે.