અમરાવતી,

120 કિમીની ગતિએ પવન અને ભારે વરસાદને કારણે રેલવે અને પરિવહન સેવાઓ ઠપ

બંગાળની ખાડીમાં સર્જાયેલા અતિ તીવ્ર ચક્રવાતી વાવાઝોડા 'મુરાસુ'એ આંધ્રપ્રદેશના દરિયાકાંઠે ત્રાટકીને ભારે તારાજી સર્જી છે. વાવાઝોડાના લેન્ડફોલ દરમિયાન ઓંગોલ, નેલ્લોર અને બાપટલા જેવા દરિયાકાંઠાના વિસ્તારોમાં ફૂંકાયેલો પવન 120 કિલોમીટર પ્રતિ કલાક સુધી પહોંચી ગયો હતો. આ ભયાનક વાવાઝોડાને કારણે દરિયામાં 10 થી 12 ફૂટ ઊંચાં તોફાની મોજાં ઉછળ્યા હતા અને ભારે વરસાદ તથા પૂરની સ્થિતિ સર્જાઈ હતી.

ભારે તબાહીની આશંકાને પગલે રાજ્યના પ્રશાસન દ્વારા હાઈ એલર્ટ જાહેર કરવામાં આવ્યું છે. તંત્રએ નીચાણવાળા વિસ્તારોમાંથી નાગરિકોને સુરક્ષિત સ્થળે ખસેડવાની કામગીરી ઝડપી બનાવી છે. વાવાઝોડાની ગંભીર અસરને કારણે રેલવે તંત્ર દ્વારા આંધ્રપ્રદેશની અનેક મહત્વપૂર્ણ ટ્રેનો રદ કરવામાં આવી છે, જેનાથી વિજયવાડા, ગુડુર અને ગુંટુર રૂટના મુસાફરો અટવાયા છે. તેમજ હવાઈ તથા માર્ગ પરિવહન સેવાઓ પણ ખરાબ રીતે પ્રભાવિત થઈ છે.