વૈશ્વિક બજારમાં વધતી અસ્થિરતા, ભૌગોલિક તણાવ અને સુરક્ષિત રોકાણની વધતી માંગને કારણે 28 જાન્યુઆરી 2026ના રોજ કિંમતી ધાતુઓએ ઇતિહાસ રચ્યો છે. ભારતીય બજારમાં સોનું અને ચાંદી બંનેએ પોતાની સર્વોચ્ચ સપાટી સ્પર્શી તમામ જૂના રેકોર્ડ ધ્વસ્ત કરી દીધા છે. એક જ દિવસે સોનામાં પ્રતિ 10 ગ્રામ ₹5000થી વધુનો ઉછાળો અને ચાંદીમાં પ્રતિ કિલોગ્રામ ₹21000થી વધુની તેજી નોંધાઈ છે, જેને બજારના ઇતિહાસમાં વિરલ માનવામાં આવી રહી છે.

MCX પર સોનાનો વાયદો ₹1,71,489ના ભાવે ખુલ્યો હતો, જે અગાઉના બંધ ભાવ ₹1,67,921ની તુલનામાં મોટો વધારો દર્શાવે છે. કારોબાર દરમિયાન સોનું ₹1,72,949ની નવી સર્વોચ્ચ સપાટીએ પહોંચ્યું હતું. આંતરરાષ્ટ્રીય બજારમાં પણ સોનાના ભાવમાં આગ જેવી તેજી જોવા મળી રહી છે અને સોનું પ્રતિ ઔંસ $5,063.82 સુધી પહોંચ્યું છે, જે વૈશ્વિક સ્તરે પણ એક મહત્વપૂર્ણ માઇલસ્ટોન ગણાય છે.
 

બીજી તરફ, ચાંદીના ભાવોએ તો રોકાણકારોને આશ્ચર્યમાં મૂકી દીધા છે. MCX પર ચાંદી ₹3,64,821ના સ્તરે ખુલ્યા બાદ જોરદાર ઉછાળો લઈને ₹3,77,655ના હાઇ લેવલ સુધી પહોંચી ગઈ હતી. અગાઉના બંધ ભાવ ₹3,56,279ની સરખામણીએ ચાંદીમાં લગભગ 5.8 ટકાનો સીધો વધારો નોંધાયો છે. વૈશ્વિક બજારમાં પણ ચાંદી $107.61ના સ્તરે ટ્રેડ થઈ રહી છે, જે તેની અત્યાર સુધીની સૌથી ઊંચી કિંમત છે.

બજાર નિષ્ણાતોના જણાવ્યા મુજબ, આંતરરાષ્ટ્રીય સ્તરે ચાલી રહેલા ભૌગોલિક સંઘર્ષ, ડૉલરના મૂલ્યમાં ઉતાર-ચઢાવ અને વૈશ્વિક અર્થવ્યવસ્થાની અનિશ્ચિતતા વચ્ચે રોકાણકારો સુરક્ષિત વિકલ્પ તરીકે સોના અને ચાંદી તરફ વળ્યા છે. પરિણામે કિંમતી ધાતુઓમાં એકસાથે જોરદાર તેજી જોવા મળી છે.

આવો એક જ દિવસમાં સોનામાં ₹5000 અને ચાંદીમાં ₹21000થી વધુનો ઉછાળો બજારના ઇતિહાસમાં બહુ ઓછા વખત જોવા મળ્યો છે. હાલની સ્થિતિ જોતા નિષ્ણાતો માને છે કે આવનારા સમયમાં પણ કિંમતી ધાતુઓના ભાવમાં ઊંચા સ્તરે અસ્થિરતા યથાવત રહી શકે છે.