ભારતીય ક્રિકેટના સૌથી લડાકૂ અને ભાવુક ખેલાડીઓમાંના એક યુવરાજ સિંહે જૂન 2019માં અચાનક આંતરરાષ્ટ્રીય ક્રિકેટ અને IPLમાંથી સંન્યાસ લીધો હતો. તે સમયે ચાહકો માટે આ નિર્ણય આશ્ચર્યજનક હતો, પરંતુ હવે વર્ષો પછી યુવરાજે પોતાના સંન્યાસ પાછળના અસલ કારણો ખુલ્લેઆમ કહી દીધા છે. સાનિયા મિર્ઝાના યુટ્યુબ પોડકાસ્ટ *‘Serving It Up With Sania’*માં વાત કરતાં યુવરાજે સ્વીકાર્યું કે કરિયરના અંતિમ તબક્કામાં તે પોતે જ પોતાને અલગ-થલગ અનુભવી રહ્યો હતો.
 

‘મારી રમતનો કોઈ સન્માન નહોતું’

યુવરાજે સ્પષ્ટ શબ્દોમાં કહ્યું કે, “સાચું કહું તો હું મારી રમત એન્જોય કરતો જ નહોતો. મને લાગતું હતું કે કોઈ મારા યોગદાનનું સન્માન નથી કરી રહ્યું. ન તો મને સપોર્ટ મળતો હતો, ન તો રિસ્પેક્ટ.” તેણે ઉમેર્યું કે જ્યારે રોજ મેદાનમાં ઉતરતા પહેલા જ મન ભારભૂત થઈ જાય, ત્યારે સમજી જવું જોઈએ કે કંઈક ખોટું ચાલી રહ્યું છે. આ ભાવનાએ તેને વારંવાર વિચારવા મજબૂર કર્યો કે તે આખરે  શા માટે ક્રિકેટ રમતો રહ્યો છે.
 

2017 બાદ ટીમમાંથી બહાર થવાનો આઘાત

યુવરાજ 2017ની ચેમ્પિયન્સ ટ્રોફી બાદ ભારતીય ટીમમાંથી બહાર થઈ ગયો હતો. ત્યારબાદ સતત અવગણનાએ તેને માનસિક રીતે તોડી નાખ્યો હતો. તેણે જણાવ્યું કે જ્યારે તમને લાગે કે હવે તમે આગળ વધી શકશો નહીં, ત્યારે જાતને બળજબરીથી ખેંચતા રહેવું યોગ્ય નથી. “ક્રિકેટે મને ઘણું આપ્યું, પરંતુ જ્યારે એ જ રમત દુઃખ આપવા લાગે, ત્યારે દૂર થવું જ સારું,” એમ યુવરાજે કહ્યું.
 

સંન્યાસનો નિર્ણય અને આત્મસ્વીકાર

યુવરાજે કહ્યું કે જે દિવસે તેને અંદરથી લાગ્યું કે હવે નહીં થઈ શકે, એ જ દિવસે તેણે સંન્યાસનો નિર્ણય લઈ લીધો. “મારે કંઈ સાબિત કરવાનું બાકી નહોતું. હું શારીરિક અને માનસિક રીતે થાકી ગયો હતો,” એમ તેણે સ્વીકાર્યું. આ નિર્ણય તેના માટે પીડાદાયક હતો, પરંતુ જરૂરી પણ હતો.
 

ક્રિકેટ બાદ ગોલ્ફથી મળી નવી શાંતિ
 

ક્રિકેટ પછી યુવરાજ ગોલ્ફ તરફ વળ્યો. તેણે ગોલ્ફને પોતાના માટે સ્વતંત્રતા સમાન ગણાવી. યુવરાજના કહેવા મુજબ, “ગોલ્ફ એવી રમત છે જે હું માત્ર મારા માટે રમું છું, કોઈ દેશ કે ટીમના દબાણ વિના.” મિત્રો સાથે રમવાની મજા, લાંબા શોટ્સ મારવાની લાગણી તેને ક્રિકેટમાં છગ્ગા ફટકારવાની યાદ અપાવે છે. ગોલ્ફથી તેને માનસિક શાંતિ અને ફિટનેસ બંને મળે છે.
 

BCCI કે સિલેક્શન કમિટીમાં ભૂમિકા?

જ્યારે યુવરાજને પૂછવામાં આવ્યું કે શું તે ભવિષ્યમાં BCCI, સિલેક્શન કમિટી અથવા વહીવટીતંત્રમાં જોડાશે, ત્યારે તેણે કહ્યું કે હાલ તેની પ્રાથમિકતા તેના બાળકો છે. “મારા બાળકો હજુ નાના છે અને હું આ સમય ગુમાવવા માગતો નથી.” જોકે, તેણે સ્વીકાર્યું કે IPLમાં કોચ અથવા મેન્ટર તરીકે યુવા ખેલાડીઓ સાથે કામ કરવું તેને ગમશે.
 

કેન્સર સામે લડત: જીવનનો સૌથી મોટો નિર્ણય

પોડકાસ્ટ દરમિયાન યુવરાજે કેન્સર સામેની લડત વિશે પણ ભાવુક ખુલાસો કર્યો. તેણે જણાવ્યું કે એક સમયે ડૉક્ટરે તેને કહ્યું હતું કે તેની પાસે માત્ર 3થી 6 મહિના જ બાકી છે. ત્યારે તેની સામે બે રસ્તા હતા – ક્રિકેટ રમતા રહો અને જીવ ગુમાવો, અથવા સારવાર લો. યુવરાજે આને પોતાના જીવનનો સૌથી મુશ્કેલ નિર્ણય ગણાવ્યો.
 

માતા માટે ઘર ખરીદવાની લાગણી

યુવરાજે પોતાની પહેલી કમાણીમાંથી માતા માટે ઘર ખરીદવાનું અનુભવ જીવનની સૌથી ભાવનાત્મક ક્ષણ ગણાવ્યો. તેણે કહ્યું કે પોતાની માતાને પોતાનું ઘર આપવું એ તેની સૌથી મોટી સિદ્ધિઓમાંની એક હતી. બાળકો સાથેના મજબૂત સંબંધ માટે તેણે પત્ની હેઝલને શ્રેય આપ્યું.
 

છ છગ્ગા: ગુસ્સો કે જૂનૂન?

2007ના T20 વર્લ્ડ કપમાં એન્ડ્રુ ફ્લિન્ટોફ સામે મારેલા ઐતિહાસિક છ છગ્ગા અંગે યુવરાજે કહ્યું કે તે ક્ષણ ભાવનાઓથી ભરેલી હતી. ફ્લિન્ટોફ સાથે થયેલી બોલાચાલીએ અંદરના ગુસ્સાને તાકાતમાં ફેરવી દીધો અને એ જ ગુસ્સો ઇતિહાસ બની ગયો.
 

યુવરાજે સ્વીકાર્યું કે કરિયરના અંતિમ દિવસોમાં ક્રિકેટ તેના માટે બોજ બની ગયું હતું. “જ્યારે રમતમાં આનંદ ન રહે, ત્યારે રોકાઈ જવું જ બહાદુરી છે,” એમ કહી યુવરાજે પોતાના સંન્યાસ પાછળનું અસલ સત્ય દુનિયા સામે મૂકી દીધું.