રાજકોટ,

સુરેન્દ્રનગર જિલ્લાના ચોટીલા ખાતે આવેલું પ્રસિદ્ધ ચામુંડા માતાજી મંદિર નવરાત્રિ દરમિયાન માઈભક્તો માટે વિશેષ આસ્થાનું કેન્દ્ર બને છે. આ વર્ષે પણ નવરાત્રિ મહોત્સવને લઈને મંદિર તરફથી આરતી, દર્શન, હવન અને ભોજન-પ્રસાદ સહિતની વ્યવસ્થાનું સમયપત્રક જાહેર કરવામાં આવ્યું છે.

જાહેર કરાયેલા કાર્યક્રમ મુજબ 11 ઓક્ટોબરથી 19 ઓક્ટોબર દરમિયાન નવરાત્રિ મહોત્સવ યોજાશે. નવરાત્રિના પ્રથમ નોરતાની સવારે તેમજ આઠમના દિવસે માતાજીની આરતી વહેલી સવારે 4 વાગ્યે કરવામાં આવશે. જ્યારે અન્ય દિવસોમાં સવારની આરતીનો સમય 5 વાગ્યાનો રહેશે. આરતીના સમયને ધ્યાનમાં રાખીને પગથિયા દ્વાર આરતીના આશરે 30 મિનિટ પહેલાં ખોલવામાં આવશે, જેથી ભક્તો સમયસર મંદિર પરિસરમાં પહોંચી શકે.

સાંજની આરતીનો સમય સૂર્યાસ્તના સમય મુજબ રાબેતા પ્રમાણે રહેશે. નવરાત્રિ દરમિયાન મોટી સંખ્યામાં ભક્તો ચામુંડા માતાજીના દર્શન માટે ચોટીલા પહોંચે તેવી શક્યતા છે.

આ ઉપરાંત 18 ઓક્ટોબરે હવનાષ્ટમી નિમિત્તે ડુંગર ઉપર વિશેષ હવનનું આયોજન કરવામાં આવ્યું છે. આ દિવસે બપોરે 2:30 વાગ્યે હવનનું બીડું હોમવામાં આવશે.

નવરાત્રિના હવનાષ્ટમી સિવાયના આઠ નોરતામાં મંદિરના ભોજનાલયમાં બપોરે 11થી 2 વાગ્યા સુધી ભોજન-પ્રસાદની વ્યવસ્થા રહેશે. જ્યારે હવનાષ્ટમીના દિવસે બીડું હોમાયા બાદ બપોરે 3 વાગ્યે ભોજન-પ્રસાદ આપવામાં આવશે.

આ રીતે નવરાત્રિ દરમિયાન ચોટીલા ધામમાં ભક્તો માટે દર્શન, આરતી અને ધાર્મિક કાર્યક્રમોની વિશેષ વ્યવસ્થા કરવામાં આવી છે.