રાજકોટ,

થોડા કિલોમીટરનું અંતર વધશે પણ કિંમતી સમય બચશે

રાજકોટ અને ભાવનગર વચ્ચે મુસાફરી કરતા વાહનચાલકો માટે એક મોટા રાહતના સમાચાર સામે આવ્યા છે. લાંબા સમયથી ટ્રાફિકની સમસ્યાથી ગ્રસ્ત રાજકોટ-ભાવનગર હાઈવે પર હવે મુસાફરોને મોટી રાહત મળવા જઈ રહી છે. હાઈવે પર આવતા સરધાર અને આટકોટ ગામોમાંથી પસાર થવાને બદલે હવે વાહનો સીધા બાયપાસ થઈને જઈ શકશે, જેનાથી મુસાફરોનો સમય બચશે.
વહીવટી તંત્ર અને માર્ગ-મકાન વિભાગ દ્વારા કરવામાં આવેલા આયોજન મુજબ, સરધાર અને આટકોટ ગામોની આસપાસ ૮-૮ કિલોમીટર લંબાઈ ધરાવતા બે નવા બાયપાસ તૈયાર કરવામાં આવશે. આ પ્રોજેક્ટનો મુખ્ય ઉદ્દેશ્ય હાઈવે પરના વ્યસ્ત ગામડાઓના ટ્રાફિકમાંથી વાહનોને મુક્ત કરી હાઈવેને અવરોધરહિત બનાવવાનો છે.

નિષ્ણાતોના મતે, આ બાયપાસ બનવાથી મુસાફરીના કુલ અંતરમાં થોડા કિલોમીટરનો વધારો થઈ શકે છે. પરંતુ, ગામડાઓના સાંકડા રસ્તાઓ અને ટ્રાફિકમાં ફસાવાને કારણે જે સમયનો બગાડ થતો હતો, તેમાં નોંધપાત્ર ઘટાડો થશે. વાહનચાલકો હવે કોઈપણ અડચણ વગર પોતાની ગંતવ્ય સ્થાન સુધી ઝડપથી પહોંચી શકશે, જે લાંબા ગાળે ઈંધણ અને સમય બંનેની દ્રષ્ટિએ ફાયદાકારક સાબિત થશે.