રાજકોટ,

ભક્તિમય સંગીત અને આરતીથી ૨ લાખથી વધુ શ્રદ્ધાળુઓમાં સકારાત્મક ચેતનાનો સંચાર

રાજકોટના આજી નદી કિનારે આવેલા રામનાથપરા સ્મશાન પરિસરમાં આવેલા રામનાથ મહાદેવના પવિત્ર મંદિરે દરરોજ ગૂંજતી વિશેષ ઓર્કેસ્ટ્રા આરતી અને ભક્તિમય સંગીતથી અત્યાર સુધીમાં ૨ લાખથી વધુ ભક્તોમાં એક નવી આધ્યાત્મિક અને સકારાત્મક ચેતના જાગૃત થઈ છે.

સામાન્ય રીતે સ્મશાન ભૂમિને ડર, શોક અને અમંગળ સ્થળ માનવામાં આવતું હોય છે, પરંતુ રામનાથપરા સ્મશાન ખાતે હાથ ધરાયેલી આ ઝુંબેશથી નાગરિકોનો સ્મશાન પ્રત્યેનો દૃષ્ટિકોણ સાવ બદલાઈ ગયો છે. આ પવિત્ર ધામમાં દિવ્ય ઓર્કેસ્ટ્રાના સૂર સાથે થતી મહાદેવની આરતીનો લાભ લેવા માટે માત્ર રાજકોટ જ નહીં પરંતુ આસપાસના વિસ્તારોમાંથી પણ મોટી સંખ્યામાં શ્રદ્ધાળુઓ ઉમટી પડે છે. આ નવીન પહેલના પરિણામે લોકોના મનમાંથી ભય, અંધશ્રદ્ધા અને નકારાત્મકતા દૂર થઈ છે અને સ્મશાન પરિસર હવે એક પવિત્ર શ્રદ્ધા અને ચેતનાના સ્થળ તરીકે ઉભરી આવ્યું છે.