ગાંધીનગર,

રસ્તા-શેડ બનાવ્યા વગર જ કૃત્રિમ ફોટા અપલોડ કરી નાણાં પડાવવાનો પર્દાફાશ

ગાંધીનગર મનપાના વોર્ડ નંબર 11માં જમીન પર વાસ્તવિક ધોરણે કોઈપણ પ્રકારના રસ્તા, શેડ કે ફેન્સિંગનું કામ કર્યા વગર જ આર્ટિફિશિયલ ઇન્ટેલિજન્સની મદદથી બનાવટી અને નકલી ફોટોગ્રાફ્સ તેમજ સર્ટિફિકેટ તૈયાર કરીને સરકારી બિલ મંજૂર કરાવી લેવાનું મોટું કૌભાંડ પ્રકાશસમાં આવ્યું છે.

આ પ્રકરણમાં મુખ્ય કોન્ટ્રાક્ટર 'સમીર કન્સ્ટ્રક્શન એજન્સી' દ્વારા અંદાજે રૂ. 70થી 80 લાખના વિકાસ કાર્યોનો પેટા કોન્ટ્રાક્ટ હર્ષવર્ધન નામના ભૂતપૂર્વ આઉટસોર્સિંગ કર્મચારીને આપવામાં આવ્યો હતો. આ કર્મચારીએ ઇજનેરી વિભાગના જવાબદાર અધિકારીઓ સાથે સાંઠગાંઠ રચીને સ્થળ પર કામ કર્યા વિના જ એઆઈ જનરેટેડ ફોટા સોફ્ટવેરમાં અપલોડ કરી દીધા હતા. સમગ્ર કૌભાંડની ગંભીરતાને ધ્યાનમાં લઈને મ્યુનિસિપલ કમિશનર દ્વારા સંડોવાયેલા જવાબદાર ઇજનેરોની સામૂહિક બદલીના આદેશો આપવામાં આવ્યા છે અને તંત્ર દ્વારા આ માને લઈને ઊંડાણપૂર્વકની તપાસ હાથ ધરવામાં આવી છે.