નવી દિલ્હી,

ચક્રવાતી પરિભ્રમણને કારણે હવામાન બદલાયું; દિલ્હીમાં પ્રદૂષણ વધતા ગ્રેપ-૧ લાગુ

ભારતીય હવામાન વિભાગ અનુસાર, આંદામાન સમુદ્ર પર સક્રિય થયેલા ચક્રવાતી પરિભ્રમણને કારણે બંગાળની ખાડીમાં એક મજબૂત નીચા દબાણનું ક્ષેત્ર (સાયક્લોનિક સિસ્ટમ) સર્જાઈ રહ્યું છે. આ નવી હવામાન પ્રણાલીને લીધે ઉત્તર પ્રદેશ અને દિલ્હી સહિત દેશના ૧૧ જેટલા રાજ્યોમાં ભારે વરસાદ અને તેજ વાવાઝોડાનું જોખમ તોળાઈ રહ્યું છે, જેને લઈને હવામાન વિભાગે એલર્ટ જારી કર્યું છે.

આ સિસ્ટમના પ્રભાવ હેઠળ તમિલનાડુ, પુડુચેરી, કેરળ, કર્ણાટક, આંધ્રપ્રદેશ, પશ્ચિમ બંગાળ, બિહાર, પંજાબ, ઉત્તર પ્રદેશ તેમજ ઉત્તરાખંડ અને હિમાચલ પ્રદેશ જેવા પર્વતીય રાજ્યોમાં ભારેથી અતિ ભારે વરસાદ પડવાની સંભાવના છે. કેટલીક જગ્યાએ ૭૫ કિલોમીટર પ્રતિ કલાકની ઝડપે તોફાની પવન પણ ફૂંકાઈ શકે છે.
બીજી તરફ, ઉત્તર ભારતમાં શિયાળાના આગમન સાથે જ દિલ્હી-એનસીઆરમાં હવાની ગુણવત્તા કથળીને AQI ૨૮૭ પર પહોંચી ગઈ છે, જેના કારણે પ્રદૂષણ નિયંત્રણ માટે 'ગ્રેપ-૧' (GRAP-1) ના નિયમો લાગુ કરવામાં આવ્યા છે.