ચંદીગઢ,

પૂર્વ IPS કુંવર વિજય પ્રતાપ સિંહ સહિતના ધારાસભ્યોના પક્ષપલટાથી  માન સરકાર મુશ્કેલીમાં

પંજાબ આમ આદમી પાર્ટીને માત્ર 24 કલાકના ટૂંકા સમયગાળામાં એક પછી એક મોટા ઝટકા લાગ્યા છે. અમૃતસર નોર્થના ધારાસભ્ય અને જાણીતા પૂર્વ IPS અધિકારી કુંવર વિજય પ્રતાપ સિંહે પંજાબ વિધાનસભાના સભ્યપદેથી રાજીનામું આપી વિધાનસભા અધ્યક્ષ કુલતાર સિંહ સંધવાં સમક્ષ મોકલી આપ્યું છે.

આ અગાઉ રવિવારે જ સમાના બેઠકના ધારાસભ્ય ચેતન સિંહ જોડામાજરા અને સનોર બેઠકના ધારાસભ્ય હરમીત સિંહ પઠાનમાજરાએ પણ પક્ષ અને ધારાસભ્યપદેથી રાજીનામા ધરી દીધા હતા. આ ત્રણેય નેતાઓ રાજીનામા બાદ તરત જ ભાજપના કાર્યાલયે પહોંચ્યા હતા અને ભારતીય જનતા પાર્ટીનો ખેસ ધારણ કરી લીધો હતો. કુંવર વિજય પ્રતાપ સિંહ લાંબા સમયથી પોતાની જ સરકારની કાર્યશૈલી અને નીતિઓ સામે જાહેરમાં અવાજ ઉઠાવી રહ્યા હતા. છેલ્લા 24 કલાકમાં ત્રણ ધારાસભ્યોના રાજીનામા અને ભાજપમાં જોડાવાની આ ઘટનાથી ભગવંત માન સરકાર સામે રાજકીય સંકટ વધુ ઘેરૂ બન્યું છે.