નવી દિલ્હી ,

અમેરિકન રાષ્ટ્રપતિ ડોનાલ્ડ ટ્રમ્પે રશિયા સામે એક અત્યંત કડક પગલું ભરતા નવા પ્રતિબંધક કાયદાને મંજૂરીની સત્તા આપતી હસ્તાક્ષર પ્રક્રિયા પૂર્ણ કરી દીધી છે. આ નવા કાયદા હેઠળ અમેરિકાને રશિયા અને ઈરાન પાસેથી ક્રૂડ ઓઈલ કે કુદરતી ગેસની આયાત કરતા દેશો પર ૧૦૦% સુધીનો જંગી ટેરિફ  લાદવાની સત્તા પ્રાપ્ત થઈ છે. આ કાયદો અમલી બનતા ભારત જેવા દેશો માટે સીધી અને ગંભીર અસર ઊભી થઈ શકે છે, કારણ કે ભારત પોતાની ઊર્જા જરૂરિયાતો માટે મોટા પ્રમાણમાં રશિયન ઓઈલની આયાત કરે છે.

બંને ગૃહની મંજૂરી મળ્યા બાદ રાષ્ટ્રપતિ ડોનાલ્ડ ટ્રમ્પે તેના પર સત્તાવાર હસ્તાક્ષર કરી દીધા છે. 'લિંડસે ઓ. ગ્રેહામ સેંક્શનિંગ રશિયા એન્ડ ઈરાન એક્ટ ઓફ ૨૦૨૬' નામે ઓળખાતા આ કાયદાનો મુખ્ય ઉદ્દેશ્ય રશિયાને આર્થિક રીતે નબળો પાડીને યુક્રેન સામેના યુદ્ધને રોકવાનો છે.

આ નવા કાયદાથી ભારતની ઊર્જા સુરક્ષા સામે મોટો પડકાર ખડો થયો છે. જો કે, ભારતીય વિદેશ મંત્રાલયે અગાઉ જ સ્પષ્ટ કરી દીધું છે કે ભારત તેના ૧.૪ અબજ લોકોની ઊર્જા સુરક્ષા સુનિશ્ચિત કરવા માટે સંપૂર્ણપણે પ્રતિબદ્ધ છે અને વૈશ્વિક બજારની સ્થિતિ મુજબ વિવિધ સ્ત્રોતો દ્વારા આયાત જારી રાખશે. આ કાયદાના અમલીકરણથી ભારત-અમેરિકાના વેપાર સંબંધોમાં આગામી સમયમાં નવી ઉથલપાથલ સર્જાઈ શકે છે.