મનાલી,

સપ્ટેમ્બરના ઉત્તરાર્ધમાં સહેલાણીઓની સંખ્યા વધવાની પૂરી સંભાવના

હિમાચલ પ્રદેશના લોકપ્રિય પ્રવાસન સ્થળ મનાલી અને રોહતાંગ સહિતના ઊંચાઈવાળા વિસ્તારોમાં સિઝનની પ્રથમ હિમવર્ષા થવા પામી છે. બુધવારે સવારે પડેલા વરસાદ બાદ પર્વતમાળાઓ પર તાપમાનનો પારો ગગડતા વાતાવરણમાં ઠંડક પ્રસરી ગઈ હતી, જેના પરિણામે રોહતાંગ પાસ અને આસપાસના પર્વત શિખરો બરફની સફેદ ચાદરથી ઢંકાઈ ગયા છે. આ પ્રાકૃતિક સૌંદર્ય અને હિમવર્ષાના મનમોહક નજારા પ્રવાસીઓ માટે મુખ્ય આકર્ષણનું કેન્દ્ર બની રહ્યા છે.

સિઝનની આ પ્રથમ હિમવર્ષાના સમાચાર મળતા જ પ્રવાસીઓમાં ભારે ઉત્સાહ જોવા મળ્યો છે. આગામી સપ્તાહના વીક-એન્ડ પહેલા જ મનાલીમાં આશરે ૬૦૦ જેટલા પ્રવાસી વાહનો અને ૧૦૦થી વધુ બસો પહોંચી ચૂકી છે. મનાલીના અન્ય પ્રવાસન સ્થળોએ પણ દિવસભર પ્રવાસીઓની ભારે ચહલપહલ અને ધસારો જોવા મળ્યો છે. આ હિમવર્ષા પ્રવાસન ઉદ્યોગ માટે ખૂબ જ પ્રોત્સાહક સાબિત થશે અને સપ્ટેમ્બરના ઉત્તરાર્ધમાં પ્રવાસન ક્ષેત્રમાં વેગ આવશે. આગામી દિવસોમાં મનાલીની મુલાકાતે આવનારા પ્રવાસીઓની સંખ્યામાં નોંધપાત્ર વધારો થવાની પૂરી અપેક્ષા વ્યક્ત કરવામાં આવી રહી છે.