ઉધમપુર,

સર્ચ ઓપરેશન દરમિયાન આતંકીઓ સાથે એનકાઉન્ટર

જમ્મુ-કાશ્મીરમાં સુરક્ષા દળોને આતંકવાદ વિરોધી અભિયાનમાં મોટી સફળતા મળી છે. પ્રાપ્ત અહેવાલો અનુસાર, જમ્મુ-કાશ્મીરના ઉધમપુર વિસ્તારમાં સુરક્ષા દળો અને આતંકવાદીઓ વચ્ચે થયેલી ભારે અથડામણમાં પ્રતિબંધિત આતંકી સંગઠન 'જૈશ-એ-મોહમ્મદ'ના બે કુખ્યાત આતંકીઓને ઠાર કરવામાં આવ્યા છે.

સુરક્ષા એજન્સીઓ પાસેથી મળેલી ચોક્કસ બાતમીના આધારે ભારતીય સેના, સીઆરપીએફ અને જમ્મુ-કાશ્મીર પોલીસ દ્વારા સંયુક્ત રીતે આ વિસ્તારમાં ઘેરાબંધી અને સર્ચ ઓપરેશન શરૂ કરવામાં આવ્યું હતું. આ દરમિયાન છુપાયેલા આતંકવાદીઓએ સુરક્ષા દળો પર અંધાધૂંધ ગોળીબાર શરૂ કરી દીધો હતો. સુરક્ષા દળોએ પણ મક્કમતાપૂર્વક જવાબી કાર્યવાહી કરી હતી, જેમાં બંને આતંકીઓ માર્યા ગયા હતા. આ ઓપરેશન બાદ સુરક્ષા દળો દ્વારા આસપાસના વિસ્તારોમાં હજુ પણ સર્ચ ઓપરેશન જારી રાખવામાં આવ્યું છે જેથી અન્ય કોઈ શંકાસ્પદ કે છુપાયેલા આતંકીઓ હોય તો તેમને શોધી શકાય.