રાજકોટ,

શરદી-ઉધરસના ૮૮૨ અને સાધારણ તાવના ૭૬૭ કેસ; ડેન્ગ્યુના નવા ૬ દર્દી ઉમેરાતાં કૂલ આંક ૪૭ પર

રાજકોટ શહેરમાં બેવડી ઋતુના કારણે ઘર-ઘરમાં રોગચાળાનો ઉપદ્રવ ચિંતાજનક રીતે વધી રહ્યો છે. રાજકોટ મહાનગરપાલિકાના આરોગ્ય વિભાગ દ્વારા જાહેર કરાયેલા તાજેતરના આંકડા મુજબ, માત્ર એક જ સપ્તાહના સમયગાળા દરમિયાન શહેરમાં વાયરલ ઇન્ફેક્શન અને મચ્છરજન્ય રોગોના કુલ ૧,૭૯૩ નવા કેસ નોંધાયા છે. બદલાતા વાતાવરણને કારણે હોસ્પિટલો અને ક્લિનિકોમાં દર્દીઓની લાંબી કતારો જોવા મળી રહી છે.

તંદુરસ્તીની સ્થિતિ પર નજર કરીએ તો, છેલ્લા અઠવાડિયામાં શરદી અને ઉધરસના સૌથી વધુ ૮૮૨ કેસ અને સાધારણ તાવના ૭૬૭ કેસ સામે આવ્યા છે. આ ઉપરાંત મચ્છરજન્ય ઉપદ્રવને લીધે ડેન્ગ્યુના વધુ ૬ નવા કેસ ઉમેરાતાં ચાલુ વર્ષે ડેન્ગ્યુના કેસોનો કુલ આંકડો વધીને ૪૭ પર પહોંચી ગયો છે. મહાનગરપાલિકાના હેલ્થ ઓફિસર અને આરોગ્ય ટીમ દ્વારા શહેરના વિવિધ વોર્ડ અને વિસ્તારોમાં ફોગિંગ, મચ્છરના લાર્વા વિરોધી કામગીરી અને જાગૃતિ અભિયાન તેજ બનાવવામાં આવ્યું છે.