નવી દિલ્હી,

ઇસ્લામાબાદ આવ્યા તો પાછા નહીં ફરી શકો: પ્રદર્શનકર્તાઓને સરકારની ચેતવણી

પાકિસ્તાનની સેના અને સરકારે જેલમાં બંધ પૂર્વ વડાપ્રધાન ઇમરાન ખાનના સમર્થનમાં ઉઠી રહેલા દરેક અવાજને દબાવવાનું શરૂ કરી દીધું છે. એવું પ્રતીત થાય છે કે પાકિસ્તાની હકૂમત ઇમરાન ખાનના પરિવારને જ નિશાન બનાવી રહી છે. 'પાકિસ્તાન તહરીક-એ-ઇન્સાફ'ના સંસ્થાપક ઇમરાન ખાનની વધુ બે બહેનો, નૂરીન નિયાઝી અને ઉજમા ખાનને ૩૦ દિવસ માટે જેલમાં મોકલી દેવામાં આવી છે. કાયદો અને વ્યવસ્થા જાળવવાના નામે બંનેની અટકાયત કરવામાં આવી છે. અગાઉ એક દિવસ પહેલા જ ઇમરાન ખાનની અન્ય એક બહેન અલીમા ખાનની અટકાયત કરીને તેમને કોટ લખપત જેલ મોકલવામાં આવ્યા હતા.

જિયો ન્યૂઝના અહેવાલ મુજબ, નૂરીન નિયાઝી અને ઉજમા ખાનની ૩૦ દિવસ માટે અટકાયત કરવામાં આવી છે. અટકાયત કર્યા બાદ બંનેને કોટ લખપત જેલ મોકલી દેવામાં આવી છે, જ્યાં તેમની બીજી બહેન અલીમા ખાનને પણ અગાઉ મોકલવામાં આવ્યા હતા. આ ધરપકડો PTI ના દેશવ્યાપી વિરોધ પ્રદર્શન પહેલા કરવામાં આવી છે.

પાકિસ્તાનના જિયો ન્યૂઝે સૂત્રોના હવાલાથી અગાઉ જણાવ્યું હતું કે અલીમાના બે પુત્રો, શહરઝ ખાન અને શેર શાહની પણ લાહોરમાં અટકાયત કરવામાં આવી હતી. બાદમાં વકીલ રાણા મુદસ્સિરે પુષ્ટિ કરી હતી કે અલીમાના પુત્રોને થોડો સમય અટકાયતમાં રાખ્યા બાદ મુક્ત કરી દેવામાં આવ્યા છે.

PTI ની ઇસ્લામાબાદ માર્ચ પહેલા પાકિસ્તાન સરકાર હિંસાની ધમકીઓ આપી રહી છે. પાકિસ્તાનના ગૃહ રાજ્ય મંત્રી તલાલ ચૌધરીએ સ્પષ્ટ ચેતવણી આપી છે કે ઇસ્લામાબાદમાં વિરોધ પ્રદર્શન દરમિયાન જે લોકો કથિત રીતે આતંકવાદનો સહારો લેશે, તેમને પાછા જવા દેવામાં આવશે નહીં. બીજી તરફ, PTI ખૈબર પક્ષુન્ખ્વાના અધ્યક્ષ જુનૈદ અકબરે જણાવ્યું હતું કે પાર્ટી વિવિધ માર્ગો દ્વારા દેશની રાજધાની પહોંચશે. ગૃહ રાજ્ય મંત્રી ચૌધરીએ કહ્યું કે જો તમે શાંતિપ્રિય નાગરિક છો, તો ગમે તે રસ્તે ઇસ્લામાબાદ આવો, ભલે ૧૦૦ વખત આવો. પરંતુ સાથે જ તેમણે ચેતવણી આપી હતી કે જે લોકો આતંકવાદીઓ તરીકે આવશે, તેમને પાછા જવા દેવામાં આવશે નહીં.