રાજકોટ શહેરની શ્રી લાલ બહાદુર શાસ્ત્રી બોયઝ વિદ્યાલયના ઉચ્ચત્તર માધ્યમિક વિભાગ ખાતે વિદ્યાર્થીઓ માટે શૈક્ષણિક કારકિર્દી માર્ગદર્શન સેમિનારનું આયોજન કરવામાં આવ્યું હતું. આ સેમિનારનો મુખ્ય હેતુ ધોરણ 10 અને 12ના વિદ્યાર્થીઓને ભવિષ્ય માટે યોગ્ય માર્ગદર્શન આપવાનો અને તેમના મનમાં ઊભા થતા શૈક્ષણિક તેમજ કારકિર્દી સંબંધિત પ્રશ્નોના નિવારણ કરવાનો હતો. કાર્યક્રમમાં રોજગાર કચેરી, પ્રાદેશિક માહિતી કચેરી અને સમગ્ર શિક્ષા અભિયાનના પ્રતિનિધિઓએ હાજરી આપી વિદ્યાર્થીઓને વિવિધ વિષયો પર ઉપયોગી માહિતી આપી હતી.

સેમિનારમાં મદદનીશ નિયામક રોજગાર કચેરીના માર્ગદર્શન હેઠળ કાર્યરત કેરિયર કાઉન્સિલર શ્રી તન્વીબેન ત્રિવેદીએ વિદ્યાર્થીઓને ધોરણ 10 અને 12 પછી ઉપલબ્ધ વિવિધ અભ્યાસક્રમો અને કારકિર્દીના વિકલ્પો અંગે વિસ્તૃત માહિતી આપી. તેમણે વિજ્ઞાન, વાણિજ્ય અને કલાના પ્રવાહમાં આગળ વધવા માટેની તક, ટેકનિકલ કોર્સ, ડિપ્લોમા, આઈટીઆઈ, સ્પર્ધાત્મક પરીક્ષાઓ તેમજ સરકારી-ખાનગી ક્ષેત્રની રોજગાર તકો વિશે સમજણ આપી. વિદ્યાર્થીઓને તેમની રૂચિ, ક્ષમતા અને લક્ષ્યાંક મુજબ ક્ષેત્ર પસંદ કરવાની સલાહ આપી.
 

શ્રી તન્વીબેને રોજગાર કચેરીની કામગીરી વિશે પણ માહિતગાર કરતાં જણાવ્યું કે રોજગાર નોંધણી, કરિયર કાઉન્સેલિંગ, વિવિધ ભરતીની જાણકારી અને તાલીમ કાર્યક્રમો દ્વારા યુવાનોને માર્ગદર્શન આપવામાં આવે છે. તેમણે વિદ્યાર્થીઓને વહેલી વયે આયોજનબદ્ધ રીતે અભ્યાસ અને કારકિર્દી અંગે નિર્ણય લેવાની પ્રેરણા આપી.

કાર્યક્રમ દરમિયાન રાજકોટ પ્રાદેશિક માહિતી કચેરીના સિનિયર સબ એડિટર શ્રી જીતેન્દ્ર નિમાવતે માહિતી કમિશનરની કચેરી દ્વારા પ્રકાશિત થતી ‘રોજગાર સમાચાર’, ‘ગુજરાત પાક્ષિક’ તેમજ અન્ય શૈક્ષણિક અને વિકાસલક્ષી પ્રકાશનો વિશે વિગતવાર સમજણ આપી. તેમણે જણાવ્યું કે આ પ્રકાશનોમાં સરકારી ભરતી, સ્પર્ધાત્મક પરીક્ષાઓ, વિવિધ યોજનાઓ અને શૈક્ષણિક તકો અંગે વિશ્વસનીય માહિતી ઉપલબ્ધ હોય છે. વિદ્યાર્થીઓ નિયમિતપણે આ પુસ્તિકાઓનો અભ્યાસ કરે તો તેઓને કારકિર્દી ઘડવામાં સહાય મળે છે.

સમગ્ર શિક્ષા અભિયાન હેઠળ કરિયર કાઉન્સિલર ડૉ. કર્તવી ભટ્ટે વિદ્યાર્થીઓ સાથે સંવાદાત્મક રીતે માર્ગદર્શન આપ્યું. તેમણે શૈક્ષણિક મનોવૈજ્ઞાનિક પ્રશ્નોત્તરી દ્વારા વિદ્યાર્થીઓની રસ-રૂચિ અને શક્તિઓને ઓળખવાની રીત સમજાવી. પરીક્ષાનો ભય કેવી રીતે દૂર કરવો, સમય વ્યવસ્થાપન કેવી રીતે કરવું, સ્ટ્રેસ મેનેજમેન્ટ અને આત્મવિશ્વાસ વિકસાવવા માટેના ઉપાયો વિશે પણ માર્ગદર્શન આપ્યું. ડૉ. ભટ્ટે જણાવ્યું કે સફળતા માટે માત્ર મહેનત જ નહીં પરંતુ માનસિક સ્થિરતા અને સકારાત્મક વિચારસરણી પણ જરૂરી છે.

કાર્યક્રમ દરમિયાન વિદ્યાર્થીઓએ ઉત્સાહપૂર્વક પ્રશ્નો પૂછ્યા અને નિષ્ણાતો પાસેથી સ્પષ્ટતા મેળવી. ઘણા વિદ્યાર્થીઓએ તેમના ભવિષ્ય અંગેની ગૂંચવણો દૂર થઈ હોવાનું જણાવ્યું. સેમિનારે વિદ્યાર્થીઓમાં આત્મવિશ્વાસ અને સ્પષ્ટ દિશા પ્રદાન કરવાની મહત્વપૂર્ણ ભૂમિકા ભજવી.

આ પ્રસંગે શાળાના આચાર્યશ્રી અલ્પેશભાઈ ભંડેરીએ મહેમાનોનું સ્વાગત કરતાં જણાવ્યું કે આજના સ્પર્ધાત્મક યુગમાં યોગ્ય માર્ગદર્શન ખૂબ જરૂરી છે. શાળા સતત વિદ્યાર્થીઓના સર્વાંગી વિકાસ માટે વિવિધ કાર્યક્રમો આયોજિત કરતી રહે છે. તેમણે વિદ્યાર્થીઓને સેમિનારમાંથી મળેલી માહિતીનો લાભ લઈ યોગ્ય લક્ષ્યાંક નક્કી કરવા પ્રેરિત કર્યા.
 

શિક્ષકશ્રી હાજુમાંબેન મકરાણી, શ્રી શિલ્પાબેન, શ્રી કિશનભાઈ, શ્રી હર્ષદભાઈ ખખ્ખર, શ્રી નિલેશભાઈ પટેલ સહિતના શિક્ષકો તથા મોટી સંખ્યામાં વિદ્યાર્થીઓ હાજર રહ્યા હતા. સમગ્ર કાર્યક્રમ સકારાત્મક અને માર્ગદર્શક વાતાવરણમાં સંપન્ન થયો.

આ કારકિર્દી માર્ગદર્શન સેમિનાર વિદ્યાર્થીઓ માટે પ્રેરણાદાયક સાબિત થયો છે. ભવિષ્યની સ્પર્ધાત્મક દુનિયામાં સફળતા મેળવવા માટે યોગ્ય દિશા, માહિતી અને માનસિક તૈયારી જરૂરી છે—અને આ કાર્યક્રમ દ્વારા વિદ્યાર્થીઓને તે માટે મજબૂત પાયા મળ્યા છે.