ગાંધીનગર,

છેલ્લા 7 માસમાં સ્કેનિંગ ટેકનોલોજી દ્વારા 34 હજારથી વધુ ફરિયાદોનો નિકાલ

ગુજરાત રાજ્ય માર્ગ વાહનવ્યવહાર નિગમ દ્વારા એસ.ટી. બસોમાં મુસાફરોની બેઠક (સીટ)ની પાછળ અને બસના મુખ્ય ભાગોમાં વિશેષ QR કોડ લગાડવામાં આવ્યા છે. આ ડિજિટલ QR કોડને પોતાના સ્માર્ટફોન વડે સ્કેન કરીને મુસાફરો કોઈ પણ ઝંઝટ વગર બસની સેવા, સ્વચ્છતા, સમયપાલન કે સ્ટાફના વર્તન અંગે સીધી જ ફરિયાદ કે સકારાત્મક સૂચન નોંધાવી શકશે.

આ ‘પેસેન્જર ફીડબેક અને પરફોર્મન્સ રેટિંગ સિસ્ટમ’ અમલમાં આવ્યા બાદ મુસાફરો તરફથી મોટો પ્રતિસાદ સાંપડ્યો છે. સિસ્ટમના માધ્યમથી છેલ્લા ૭ મહિનામાં મળેલી આશરે ૩૪ હજાર જેટલી વિવિધ ફરિયાદો અને સૂચનોનું ત્વરિત અને સંતોષકારક નિવારણ કરવામાં આવ્યું છે. મુસાફરો બસમાં ૧ થી ૫ સુધીનું રેટિંગ આપી શકે છે અને જો કોઈ સમસ્યા હોય તો તેના ફોટોગ્રાફ પણ સીધા અપલોડ કરી શકે છે. આ ડેટા સીધો વિભાગીય અધિકારીઓ અને ડેપો મેનેજર સુધી પહોંચતો હોવાથી તાત્કાલિક પગલાં ભરવામાં આવે છે.

અમદાવાદ, વડોદરા, સુરત, રાજકોટ સહિતના તમામ ૧૬ ડિવિઝન અને ૪૦૦થી વધુ બસ ડેપો અંતર્ગત દોડતી ૮,૦૦૦થી વધુ બસોમાં આ ક્યુઆર કોડ આધારિત ફીડબેક સિસ્ટમ કાર્યરત કરવામાં આવી રહી છે.