નવી દિલ્હી,

કેવન પટેલની ધરપકડ, ઇજાગ્રસ્ત કિશોર કલાક સુધી મદદ વિના તડપતો રહ્યો

અમેરિકાના ફ્લોરિડા રાજ્યના વેસ્ટ મેલબોર્ન વિસ્તારમાં ગુજરાતી મૂળના 32 વર્ષીય સ્ટોર માલિક કેવન પટેલની પોલીસે ધરપકડ કરી છે. કેવન પટેલ પર પોતાના સ્ટોરમાં ચોરી થઈ હોવાની શંકાના આધારે એક 14 વર્ષના અજ્ઞાત કિશોરનો કારમાં પીછો કરી, તેને ઇરાદાપૂર્વક જોરદાર ટક્કર મારી ગંભીર રીતે ઘાયલ કરવાનો અને ત્યારબાદ ઘટનાસ્થળેથી ભાગી જવાનો ગંભીર આરોપ મૂકવામાં આવ્યો છે.

સ્ટોરમાં ચોરીની શંકા ગયા બાદ કેવન પટેલે કાયદો હાથમાં લઈને કિશોરનો કારમાં પીછો કર્યો હતો અને રસ્તા પર તેને અડફેટે લીધો હતો. ટક્કર એટલી ભયાનક હતી કે 14 વર્ષીય કિશોર ગંભીર રીતે ઘવાયો હતો. અકસ્માત સર્જ્યા બાદ સ્ટોર માલિક તેને સારવાર આપવા કે પોલીસને જાણ કરવાના બદલે લોહીલુહાણ હાલતમાં રસ્તા પર જ છોડીને ફરાર થઈ ગયો હતો.

મેલબોર્ન પોલીસનેરસ્તાના કિનારે અત્યંત ગંભીર હાલતમાં પડેલો ૧૪ વર્ષનો કિશોર મળી આવ્યો હતો. તેને તાત્કાલિક સ્થાનિક હોસ્પિટલમાં ખસેડવામાં આવ્યો હતો, જ્યાં તેની હાલત અત્યંત નાજુક હોવાનું કહેવાય છે. આ મામલે વેસ્ટ મેલબોર્ન પોલીસે કેવન પટેલ સામે જીવલેણ હુમલો અને ગંભીર શારીરિક ઇજા પહોંચાડીને અકસ્માત સ્થળેથી ભાગી જવા સહિતની ગંભીર કલમો હેઠળ ગુનો નોંધી તેની ધરપકડ કરી છે.