ગાંધીનગર,

૧૬ લાખ બાળકોના પોષણ માટે વાર્ષિક રૂ. ૮૦ કરોડનો વધારાનો બોજ રાજ્ય સરકાર ઉઠાવશે

મહિલા અને બાળ વિકાસ વિભાગ અંતર્ગત રાજ્યની ૫૩,૬૦૫ આંગણવાડીઓમાં અભ્યાસ કરતા ૩ થી ૬ વર્ષના ૧૬ લાખથી વધુ ભૂલકાંઓને પીરસાતા ગરમ ભોજન—હૉટ કુક્ડ મીલ માટે સ્થાનિક ખરીદીના દર પ્રતિ બાળક રૂ. ૫.૧૦ થી વધીને સીધા રૂ. ૮.૫૦ કરી દેવામાં આવ્યા છે.

આ દરમાં કરાયેલા ૬૭ ટકાના જંગી વધારાથી આંગણવાડી કાર્યકરોને ગુણવત્તાસભર અને તાજી સામગ્રી ખરીદવા માટે મજબૂત નાણાકીય ટેકો મળશે. દૈનિક દર દીઠ થયેલા રૂ. ૩.૪૦ ના આ વધારાનો વાર્ષિક આશરે રૂ. ૮૦ કરોડનો તમામ ખર્ચ રાજ્ય સરકાર સંપૂર્ણપણે પોતાના ભંડોળમાંથી ઉઠાવશે.

નવા સ્વાદિષ્ટ અને પૌષ્ટિક મેનુમાં પ્રોટીનયુક્ત આહાર જેવાં કે ફણગાવેલા મગ, મસાલા ચણા, તુવેરદાળ, મગ-ભાત ઉપરાંત ગુજરાતી વાનગીઓમાં દૂધીના ઢેબરા, ગરમાગરમ સુખડી, શીરો, ઢોકળાં, ઈડલી, મોસમી શાકભાજીના મુઠિયાં અને તાજાં ફળોનો સમાવેશ કરવામાં આવ્યો છે. રાજ્ય સરકારનો આ અભિગમ ૧૬ લાખથી વધુ બાળકોને કુપોષણમુક્ત, સ્વસ્થ અને તેજસ્વી બનાવવામાં આશીર્વાદરૂપ સાબિત થશે.