રાજકોટ,

બુકિંગ મર્યાદા વધારીને ૯૦થી ૧૮૦ દિવસ કરાતા નાગરિકોને મોટી રાહત

રાજકોટ મહાનગરપાલિકા દ્વારા નાગરિકો માટે અમલમાં મૂકવામાં આવેલો ૧૮૦ દિવસ અગાઉ હોલ બુકિંગનો નવો નિયમ તંત્ર અને અરજદારો બંને માટે ખૂબ જ ફળદાયી સાબિત થયો છે. અગાઉ હોલ બુકિંગની મર્યાદા માત્ર ૯૦ દિવસની હતી, જેને વધારીને ૧૮૦ દિવસ કરવામાં આવતાં નાગરિકોને પોતાના પરિવારના પ્રસંગો માટે આગોતરૂ આયોજન કરવામાં ભારે સરળતા રહી છે.

જેના પરિણામે મનપાના વિવિધ કોમ્યુનિટી હોલ આગામી ૨૮ માર્ચ સુધી સંપૂર્ણપણે હાઉસફુલ થઈ ગયા છે. તંત્ર દ્વારા લેવાયેલા આ લોકઉપયોગી નિર્ણયના કારણે લગ્નસરા અને અન્ય ધાર્મિક પ્રસંગો યોજતા અરજદારોને હોલ મેળવવાની અનિશ્ચિતતામાંથી મોટી મુક્તિ મળી છે અને સમગ્ર પ્રક્રિયા પારદર્શક તથા સુચારૂ બની છે.