રાજકોટ,

ડુંગળી રૂ. ૮૦ અને લીંબુ રૂ. 300ના કિલો થતાં ગૃહિણીઓ સહિત હોટલ, રેસ્ટોરન્ટ સંચાલકોનું બજેટ ખોરવાયું

દેશભરમાં મોંઘવારીએ માઝા મૂકી છે ત્યારે હવે સૌરાષ્ટ્રના પાટનગર ગણાતા રાજકોટમાં પણ રસોડા પર મોંઘવારીનો વધુ એક મોટો પ્રહાર થયો છે. સામાન્ય લોકોના રસોડામાં દૈનિક વપરાશમાં અતિ આવશ્યક ગણાતી ડુંગળી અને લીંબુના ભાવમાં બેફામ વધારો નોંધાતા મધ્યમ અને ગરીબ વર્ગનું માસિક બજેટ સંપૂર્ણપણે ખોરવાઈ ગયું છે. છેલ્લા માત્ર પંદર દિવસના ટૂંકા સમયગાળામાં જ શાકભાજી બજારમાં કિંમતો બેકાબૂ બનતા પ્રજા ચિંતામાં મુકાઈ છે.

બજારમાંથી પ્રાપ્ત વિગતો અનુસાર, ગરીબોની કસ્તૂરી ગણાતી ડુંગળીના ભાવમાં ભારે ઉછાળો જોવા મળ્યો છે. અગાઉ જે ડુંગળી હોલસેલ બજારમાં રૂ. ૨૦ થી ૩૦ પ્રતિ કિલોના ભાવે ઉપલબ્ધ હતી, તે અત્યારે છૂટક (રિટેલ) બજારમાં સીધી રૂ. ૮૦ પ્રતિ કિલોના ભાવે વેચાઈ રહી છે. માત્ર થોડા દિવસો પહેલાં જ સારી ગુણવત્તાવાળી સૂકી ડુંગળીના હોલસેલ ભાવ રૂ. ૩૫ થી ૪૫ અને રિટેલમાં રૂ. ૫૫ થી ૬૫ આસપાસ હતા, જેમાં અચાનક મોટો ઉછાળો આવ્યો છે. બીજી બાજુ, લીંબુની સ્થિતિ પણ ગંભીર બની છે; અગાઉ રૂ. ૬૦ પ્રતિ કિલો મળતા લીંબુ હાલ હોલસેલમાં રૂ. ૧૩૦ અને રિટેલ બજારમાં સીધા રૂ. ૩૦૦ પ્રતિ કિલોના રેકોર્ડબ્રેક સ્તરે પહોંચી ગયા છે. લીલા શાકભાજીના ભાવમાં પણ કિલોદીઠ રૂ. ૨૦ થી ૪૦ સુધીનો વધારો નોંધાયો છે.

આ અસહ્ય મોંઘવારીની સીધી અસર ખાણીપીણીના વેપાર પર પણ વર્તાઈ રહી છે. શહેરની નાની ગુજરાતી અને પંજાબી હોટેલોમાં જમવાની થાળી સાથે અપાતી ડુંગળી અને લીંબુ હવે ગાયબ થવા લાગ્યા છે. આ ઉપરાંત, પાંઉભાજી, ભજીયા અને દાળવડા જેવી લોકપ્રિય ખાણીપીણીની લારીઓ પર પણ ગ્રાહકોને મર્યાદિત માત્રામાં જ ડુંગળી આપવાનું અનિવાર્ય બન્યું છે.

આ બાબતે સ્થાનિક નાગરિકો અને વેપારી વર્તુળોમાં ચર્ચા છે કે અન્ન અને નાગરિક પુરવઠા તેમજ તોલમાપ વિભાગમાં પૂરતા સ્ટાફના અભાવે બજાર પર યોગ્ય નિયંત્રણ કે તપાસ થઈ રહી નથી. તંત્રની આ ઉદાસીનતાનો લાભ લઈને કેટલાક લેભાગુ તત્વો કૃત્રિમ અછત કે ઉછાળો ઊભો કરીને ગ્રાહકોને આર્થિક રીતે ભીંસમાં મૂકી રહ્યા છે. જો તાત્કાલિક ધોરણે બજારમાં શાકભાજીની આવક સુધારીને કિંમતો નિયંત્રિત કરવામાં નહીં આવે, તો સામાન્ય લોકોની મુશ્કેલીઓ આગામી દિવસોમાં વધુ વિકટ બની શકે છે.