મુંબઈ,

હોમ, કાર અને પર્સનલ લોન લેનારા ગ્રાહકોના ખિસ્સા પર વધશે બોજ

રિઝર્વ બેંક ઓફ ઈન્ડિયાની મોનેટરી પોલિસી કમિટી દ્વારા રેપો રેટમાં ૨૫ બેઝિસ પોઈન્ટ (૦.૨૫%)નો વધારો કરીને તેને ૫.૫૦ ટકા કર્યા બાદ પંજાબ નેશનલ બેંક, ઇન્ડિયન બેંક, બેંક ઓફ બરોડા અને બેંક ઓફ ઈન્ડિયા સહિતની દેશની અગ્રણી જાહેર ક્ષેત્રની બેંકોએ તેમના રેપો લિંક્ડ લેન્ડિંગ રેટ અને માર્જિનલ કોસ્ટ ઓફ ફંડ્સ બેસ્ડ લેન્ડિંગ રેટમાં તાત્કાલિક અસરથી વધારો જાહેર કર્યો છે.

આ નિર્ણયના પરિણામે હવે નવી લોન લેવી મોંઘી બનશે, તેમજ જે ગ્રાહકોની લોન ફ્લોટિંગ રેટ પર ચાલી રહી છે તેમના માસિક હપ્તામાં પણ સીધો વધારો થશે. ઉદાહરણ તરીકે, ૨૦ વર્ષની મુદ્દત માટે લીધેલી રૂ. ૨૦ લાખની હોમ લોન પર ગ્રાહકોએ હવે દર મહિને આશરે રૂ. ૩૦૦ થી વધુનો વધારાનો EMI ચૂકવવો પડશે. અધિકારીઓના જણાવ્યા મુજબ, ફુગાવાને નિયંત્રણમાં રાખવા માટે રિઝર્વ બેંકે વ્યાજદરમાં વધારો કર્યો છે, જેને પગલે વાણિજ્યિક બેંકોએ પણ પોતાના ધિરાણ દરોમાં સુધારો કરવો પડ્યો છે.