અમદાવાદ,

૯ થી ૧૫ ઑક્ટોબર દરમિયાન સમગ્ર ગુજરાતમાં વાતાવરણ કોરું રહેશે

હવામાન વિભાગ દ્વારા ૮ ઑક્ટોબરની સાંજે જાહેર કરવામાં આવેલી તાજી આગાહી મુજબ, ૯ ઑક્ટોબરથી ૧૫ ઑક્ટોબરની સવાર સુધી સમગ્ર ગુજરાતમાં હવામાન મુખ્યત્વે શુષ્ક અને કોરું રહેવાની શક્યતા દર્શાવવામાં આવી છે. જેના કારણે ચાલુ વર્ષે નવરાત્રી (નોરતાં) દરમિયાન ખેલૈયાઓ અને ગરબા આયોજકો પરથી વરસાદી વિઘ્નનું સંકટ સંપૂર્ણપણે ટળી ગયું છે.

હાલમાં ગુજરાતમાં ડબલ સીઝનનો માહોલ જોવા મળી રહ્યો છે. વહેલી સવારે અને મોડી રાત્રે ગુલાબી ઠંડીનો ચમકારો અનુભવાય છે, જ્યારે બપોરના સમયે અંગ દઝાડતી ગરમી અને અસહ્ય ઉકળાટ રહે છે. હવામાન નિષ્ણાતોના જણાવ્યા અનુસાર, ઓક્ટોબર માસના ઉત્તરાધથી લઘુત્તમ તાપમાનમાં ધીમે ધીમે ઘટાડો નોંધાશે અને નવેમ્બર મહિનાના પ્રારંભ સાથે જ રાજ્યમાં વિધિવત રીતે શિયાળાની ગુલાબી ઠંડીનો પ્રારંભ થઈ જશે.

આગામી સપ્તાહ દરમિયાન કોઈ સક્રિય વરસાદી સિસ્ટમ ન હોવાથી ખેલૈયાઓ વિના અવરોધે ગરબાની મજા માણી શકશે.