રાજકોટ,

જંગલેશ્વર ખર્ચકાંડ: દૂધનું દૂધ અને પાણીનું પાણી થશે

રાજકોટના ચકચારી જંગલેશ્વર ડિમોલિશન અને ખર્ચકાંડ મામલે છેલ્લા ત્રણ મહિનાથી ચાલી રહેલી ઉચ્ચસ્તરીય તપાસ હવે અંતિમ તબક્કામાં પહોંચી છે. આ મામલે તૈયાર કરવામાં આવેલો તપાસ રિપોર્ટ આગામી થોડા દિવસોમાં જ સત્તાવાર રીતે જાહેર કરવામાં આવશે તેવી પ્રબળ સંભાવના છે.

ઉલ્લેખનીય છે કે, રાજકોટ મહાનગરપાલિકા દ્વારા જંગલેશ્વર વિસ્તારમાં ગેરકાયદેસર બાંધકામો હટાવવા માટે મેગા ડિમોલિશન ઓપરેશન હાથ ધરવામાં આવ્યું હતું. આ ઓપરેશન દરમિયાન મશીનરી ભાડાં, ખાદ્ય સામગ્રી (ફૂડ બિલ) અને પાણીની વ્યવસ્થા પાછળ કરોડો રૂપિયાનો તોતિંગ ખર્ચ થતાં મોટો વિવાદ સર્જાયો હતો. આ સંદર્ભે પાલિકાના જનરલ બોર્ડમાં પણ ઉગ્ર ચર્ચાઓ થઈ હતી અને વહીવટી પારદર્શિતા સામે સવાલો ઉઠ્યા હતા.

આ સમગ્ર પ્રકરણમાં જે પણ અધિકારીઓ કે કર્મચારીઓની બેદરકારી અથવા ગેરરીતિ સામે આવશે, તેમની સામે મનપા અને ઉચ્ચ સ્તરેથી કડક શિસ્તભંગની પગલાં લેવામાં આવશે. આ રિપોર્ટ બહાર આવ્યા બાદ રાજકોટના રાજકારણમાં અને વહીવટી બેડામાં ભારે હલચલ મચવાની પૂરી શક્યતા છે.