હજુ શિયાળાનો અંતિમ તબક્કો ચાલી રહ્યો છે ત્યારે જ ગુજરાતમાં ઉનાળાનો અહેસાસ થવા લાગ્યો છે. ખાસ કરીને સૌરાષ્ટ્ર–કચ્છ સહિત સમગ્ર રાજ્યમાં ઠંડીનો પારો ઝડપથી ઘટી રહ્યો છે અને બપોરના સમયે તાપમાન સતત વધતું જઈ રહ્યું છે. પરિણામે લોકોએ ફરીથી પંખા અને એસીનો સહારો લેવાનું શરૂ કરી દીધું છે. હવામાન વિભાગના તાજા આંકડાઓ મુજબ રાજ્યના 13 શહેરોમાં બપોરે મહત્તમ તાપમાન 32થી 35 ડિગ્રી સેલ્સિયસ વચ્ચે નોંધાયું છે.

ગઈકાલે સૌરાષ્ટ્ર–કચ્છમાં સૌથી વધુ ગરમ શહેર તરીકે રાજકોટ નોંધાયું હતું, જ્યાં મહત્તમ તાપમાન 35 ડિગ્રી સેલ્સિયસ સુધી પહોંચી ગયું હતું. જ્યારે સમગ્ર રાજ્યમાં સૌથી વધુ તાપમાન સુરતમાં નોંધાયું હતું, જ્યાં 35.4 ડિગ્રી સેલ્સિયસ તાપમાનને કારણે લોકોને ભારે ગરમીનો સામનો કરવો પડ્યો હતો. આ બંને શહેરોમાં દિવસ દરમિયાન ઉનાળાની જેમ તીવ્ર તાપ અનુભવાયો હતો.

રાજ્યના અન્ય વિસ્તારોમાં પણ તાપમાન સામાન્ય કરતા વધારે નોંધાયું હતું. અમદાવાદમાં 32 ડિગ્રી, અમરેલીમાં 33.5, વડોદરામાં 33.6, ભાવનગરમાં 32.3, ભુજમાં 33.3, દમણમાં 32.4, ડાંગમાં 33.9, ડીસામાં 33.1, કંડલામાં 33.3, નલિયામાં 34.5 અને પોરબંદરમાં 32.4 ડિગ્રી સેલ્સિયસ મહત્તમ તાપમાન નોંધાયું હતું. આ આંકડાઓ પરથી સ્પષ્ટ થાય છે કે ફેબ્રુઆરી મહિનાની શરૂઆતમાં જ ઉનાળાની અસર દેખાવા લાગી છે.
 

ઉપરાંત આજે સવારના સમયે રાજકોટ સહિત રાજ્યના અનેક વિસ્તારોમાં હવામાં ભેજનું પ્રમાણ 70થી 87 ટકા સુધી પહોંચતા આછું ધુમ્મસ પણ જોવા મળ્યું હતું. ભેજના વધેલા પ્રમાણને કારણે ઠંડીનો અહેસાસ લગભગ પૂર્ણ રીતે ગાયબ થઈ ગયો હતો. આજે સવારે રાજકોટમાં લઘુત્તમ તાપમાન 17.2 ડિગ્રી નોંધાયું હતું. જ્યારે પોરબંદરમાં 16.5, સુરતમાં 18.8, વેરાવળમાં 17.9, ઓખામાં 18.6, અમદાવાદમાં 19, અમરેલીમાં 15.6, વડોદરામાં 17.2, ભાવનગરમાં 19.4, ભુજમાં 17.8, દમણમાં 18, ડીસામાં 14.8, દિવમાં 15.5, દ્વારકામાં 19, ગાંધીનગરમાં 18.8 અને કંડલામાં 17.5 ડિગ્રી લઘુત્તમ તાપમાન નોંધાયું હતું.

જામનગર શહેરમાં છેલ્લા એક સપ્તાહથી ઠંડી ધીમે-ધીમે વિદાય લઈ રહી હોય તેવો માહોલ જોવા મળી રહ્યો છે. અહીં લઘુત્તમ તાપમાન સતત વધતું રહ્યું હતું અને ગઈકાલે 18 ડિગ્રી સુધી પહોંચ્યા બાદ આજે ફરી બે ડિગ્રી ઘટીને 16 ડિગ્રી નોંધાયું હતું, જેથી સવારના સમયે લોકોને થોડો ગુલાબી ઠંડીનો અહેસાસ થયો હતો. જોકે દિવસ દરમિયાન મહત્તમ તાપમાનમાં ત્રણ ડિગ્રીનો વધારો નોંધાઈ 31 ડિગ્રી સુધી પહોંચતા ગરમી ફરીથી અનુભવાઈ હતી.

પવનની ગતિમાં પણ ઘટાડો નોંધાયો છે. જામનગરમાં પવનની ગતિ પ્રતિ કલાક એક કિલોમીટર ઘટીને 4.1 કિલોમીટર નોંધાઈ હતી. સાથે જ વાતાવરણમાં ભેજનું પ્રમાણ પણ છ ટકા ઘટીને 63 ટકા રહ્યું હતું. હાલ માત્ર સવાર અને સાંજના સમયે જ થોડો ઠંડીનો અહેસાસ થઈ રહ્યો છે, જ્યારે દિવસ દરમિયાન તાપમાનમાં અડધાથી બે ડિગ્રી સુધીનો વધારો સતત જોવા મળી રહ્યો છે.

હવામાન નિષ્ણાતો મુજબ આવનારા દિવસોમાં તાપમાનમાં હળવો વધારો યથાવત રહેવાની શક્યતા છે. શિયાળો હવે અંતિમ તબક્કામાં પહોંચ્યો છે અને ફેબ્રુઆરી મહિનામાં જ ઉનાળાની શરૂઆત જેવો માહોલ સર્જાઈ રહ્યો છે, જેને કારણે લોકોની દૈનિક જીવનશૈલી પર પણ તેની અસર જોવા મળી રહી છે.