જામનગર શહેર અને સમગ્ર જિલ્લામાં છેલ્લા એક દિવસથી હવામાનમાં અચાનક નોંધપાત્ર પલટો જોવા મળ્યો છે. ગઈકાલે સાંજથી જ ઠંડા અને બરફીલા પવનની શરૂઆત થઈ હતી, જેના કારણે રાત્રી દરમિયાન વાતાવરણમાં ઠંડક વધી ગઈ હતી. આ બદલાવની અસર આજે વહેલી સવારે વધુ સ્પષ્ટ રીતે જોવા મળી, જ્યારે સમગ્ર જિલ્લામાં ગાઢ ધુમ્મસ અને ઝાકળની ચાદર છવાઈ ગઈ હતી. ઝાકળભીની સવારને કારણે અનેક વિસ્તારોમાં માર્ગો ભીના થઈ ગયા હતા અને પાણીના રેલા ઉતરતા જોવા મળ્યા હતા.

ગઈકાલે સવારે લઘુતમ તાપમાન 17 ડિગ્રી સેન્ટિગ્રેડ આસપાસ નોંધાયું હતું, પરંતુ આજે તેમાં અચાનક ઘટાડો થયો છે. આજની સવારે લઘુતમ તાપમાન 14.5 ડિગ્રી સેન્ટિગ્રેડ સુધી ઘટતાં લોકોને ફરી એકવાર ઠંડીનો અહેસાસ થયો છે. ખાસ કરીને વહેલી સવારે બહાર નીકળનાર લોકો માટે ઠંડીનો ચમકારો વધુ અનુભવો પડ્યો હતો. બીજી તરફ, મહત્તમ તાપમાન 29.0 ડિગ્રી સેન્ટિગ્રેડ નોંધાયું છે, પરંતુ પવન અને ભેજને કારણે દિવસ દરમિયાન પણ હળવી ઠંડક અનુભવાઈ રહી છે.

હવામાનમાં આવેલા આ પલટાનો મુખ્ય કારણ ભેજનું પ્રમાણ વધવું માનવામાં આવી રહ્યું છે. ગઈકાલે સવારે ભેજનું પ્રમાણ આશરે 73 ટકા હતું, જ્યારે આજે તેમાં નોંધપાત્ર વધારો નોંધાયો છે. મોડી રાતથી જ ભેજનું પ્રમાણ વધીને 83 થી 86 ટકા સુધી પહોંચતાં ગાઢ ધુમ્મસ છવાઈ ગયું હતું. ભેજનું પ્રમાણ વધારે હોવાના કારણે દૃશ્યતા લગભગ શૂન્ય જેવી બની ગઈ હતી, જેના કારણે વહેલી સવારે વાહન ચાલકોને ભારે મુશ્કેલીનો સામનો કરવો પડ્યો હતો.
 

ઝાકળના કારણે વાહનોના કાચ પર પાણી જમતાં વાહન ચલાવવું જોખમી બન્યું હતું. શહેર અને જિલ્લામાં અનેક જગ્યાએ વાહનચાલકોને લાઈટો અને વાઈપર ચાલુ રાખીને વાહન ચલાવવું પડ્યું હતું. ખાસ કરીને હાઈવે અને ખુલ્લા માર્ગો પર દૃશ્યતા ઓછી હોવાને કારણે ગતિ ધીમી રાખવાની ફરજ પડી હતી. સૂર્યોદય પણ મોડો થયો હતો અને સૂર્યદેવતાના દર્શન મોડાં થતાં ઠંડીનો માહોલ વધુ સમય સુધી જળવાઈ રહ્યો હતો.

આ સાથે પવનની તીવ્રતામાં પણ વધારો નોંધાયો છે. ગઈકાલે મોડી સાંજથી જ પ્રતિ કલાક 25 થી 30 કિલોમીટર ઝડપે ઠંડો પવન ફૂંકાતો રહ્યો હતો. આજે પણ સરેરાશ પ્રતિ કલાક 20 થી 25 કિલોમીટર ઝડપે પવન ફૂંકાયો છે. પવનની આ ગતિને કારણે વાતાવરણમાં ઠંડક વધુ વધી છે અને લોકોએ ફરીથી ગરમ કપડાં બહાર કાઢવા પડ્યા છે. ખાસ કરીને સવાર અને રાત્રીના સમયે ઠંડીનો પ્રભાવ વધુ જોવા મળી રહ્યો છે.

જામનગર જિલ્લા કલેકટર કચેરીના કંટ્રોલ રૂમના જણાવ્યા અનુસાર, આજે સવારે 8 વાગ્યા સુધીના છેલ્લા 24 કલાક દરમિયાન લઘુતમ તાપમાન 14.5 ડિગ્રી સેન્ટિગ્રેડ અને મહત્તમ તાપમાન 29.0 ડિગ્રી સેન્ટિગ્રેડ નોંધાયું છે. આ સમયગાળા દરમિયાન વાતાવરણમાં ભેજનું પ્રમાણ સરેરાશ 83 ટકા રહ્યું હતું, જ્યારે પવનની ગતિ 20 થી 25 કિલોમીટર પ્રતિ કલાકની આસપાસ રહી હતી.

હવામાન નિષ્ણાતોના મતે આગામી એકાદ દિવસ સુધી વહેલી સવાર અને મોડી રાતે ધુમ્મસ અને ઝાકળની સ્થિતિ યથાવત રહી શકે છે. તાપમાનમાં મોટા ફેરફારની શક્યતા ન હોવા છતાં ઠંડા પવન અને ભેજના કારણે ઠંડીનો અહેસાસ ચાલુ રહે તેવી શક્યતા વ્યક્ત કરવામાં આવી છે. આવી પરિસ્થિતિમાં વાહન ચાલકોને સાવચેતી રાખવા અને આરોગ્ય પ્રત્યે ખાસ ધ્યાન આપવા સલાહ આપવામાં આવી છે.